ચીખલી તાલુકાના દેગામમાં ધારાસભ્ય નરેશભાઈ પટેલના ઉપસ્થિતિમાં ‘મારી માટી, મારો દેશ’ અભિયાનની ઉજવણી કરવામાં આવી 

માતૃભૂમિને નમન અને દેશનાં સપૂતોને શ્રધ્ધાંજલિ અર્પણ કરવા માટે ‘મારી માટી, મારો દેશ’ અભિયાનની ઉજવણી નવસારી જિલ્લાના ગામોમાં ઉત્સાહભરે થઈ રહી છે . નવસારી જિલ્લાના ચીખલી તાલુકાના દેગામ ગામે ગણદેવીના ધારાસભ્ય નરેશભાઈ પટેલના હસ્તે અમૃતસરોવર પર નિર્માણ પામેલા શિલાફલકમને ગ્રામજનો માટે ખુલ્લું મુકવામાં આવ્યું હતું .

આ પ્રસંગે ધારાસભ્ય નરેશભાઈ પટેલે જણાવ્યું હતું કે, સ્વતંત્રતા, એકતા અને અખંડિતતામાં યોગદાન આપનારા નાયકોને સમર્પિત કરવા અને રાષ્ટ્રપ્રેમની ભાવના પ્રજ્વલિત થાય તે માટે દેશમાં ‘મારી માટી મારો દેશ’ અભિયાનનો રાષ્ટ્ર વ્યાપી પ્રારંભ કરવામાં આવ્યો છે.

આ પ્રસંગે મહાનુભાવોએ હાથમાં ધરતી માતાની માટી લઈને માં ભારતી ને કાજે પોતાના પ્રાણ ન્યોચ્છાવર કરનારા વીર વીરાંગનાઓને અંજલિ આપવાના હેતુથી રાષ્ટ્ર પ્રથમની પ્રતિજ્ઞા લઇ દેશભક્તિનો સંદેશ આપ્યો હતો

આ અવસરે ચીખલી તાલુકા પંચાયત પ્રમુખ કલ્પનાબેન ગાંવિત, માજી જિલ્લા પંચાયત પ્રમુખ ડો.અમિતાબેન પટેલ, ચીખલી પ્રાંત અધિકારી અમિતકુમાર ચૌધરી , ગામના પદાધિકારીઓ અને ગ્રામજનો ઉપસ્થિત રહ્યા હતા.