વાલીઓ અને વિદ્યાર્થીઓને ‘કડકડતી ઠંડી’માં રાહત ના સમાચાર: ગરમ કપડા પહેરવા અંગે શિક્ષણ વિભાગે શાળાઓને કર્યો આદેશ, પરિપત્ર જાહેર કર્યો

રાજયમાં તમામ શાળાઓમાં હવેથી વિદ્યાર્થીઓને ચોક્કસ પ્રકારનાં સ્વેટર કે ગરમ કપડાં પહેરવા માટે શાળા દબાણ કરી શકાશે નહીં. રાજ્ય ના શિક્ષણ વિભાગ દ્વારા તમામ શાળાઓને પરિપત્ર દ્વારા કડક આદેશો આપવામાં આવ્યાં છે.

• ગરમ કપડાં પહેરવાને લઈને જિલ્લા શિક્ષણાધિકારીઓનો પરિપત્ર કરી નિર્ણય પાલન કરવા 

• સ્કૂલોમાં વિદ્યાર્થીઓ મનપસંદ ગરમ કપડાં પહેરી શકશે

• શાળા તરફથી કોઈપણ પ્રકારનું દબાણ નહીં કરી શકાય 

• રાજ્યની તમામ શાળાઓ માટે પરિપત્રને લઇ શિક્ષણ રાજ્યમંત્રી પ્રફુલ પાનસેરિયાએ આપી માહિતી. 

ગુજરાતમાં હવે ઠંડીની શરૂઆત થઈ ચૂકી છે ત્યારે શાળાઓમાં વિદ્યાર્થીઓ દ્વારા મનપસંદ ગરમ કપડાં ન પહેરવાને લઈને શાળાઓ દબાણ કરતી જોવા મળી છે. સ્કૂલનાં નિયમાનુસાર જ ગરમ કપડાં પહેરવા અંગેના બનાવો સામે આવ્યાં બાદ રાજ્ય શિક્ષણમંત્રી દ્વારા રાજ્યની તમામ શાળાઓને આદેશ આપવામાં આવ્યાં છે. રાજ્યની તમામ શાળાની અંદર ચોક્કસ પ્રકારનો જ સ્વેટર પહેરવો અથવા તો યૂનિફોર્મનો જ સ્વેટર પહેરવો એવા નિયમો છે ત્યાં હવે વિદ્યાર્થીઓ પોતાને ગમે તેવા ગરમ કપડાં પહેરી શકશે. પ્રાથમિક શિક્ષણ વિભાગ દ્વારા રાજ્યના તમામ જિલ્લા શિક્ષણાધિકારીઓને આ પરિપત્ર મોકલવામાં આવ્યો છે.

રાજ્ય શિક્ષણ મંત્રીના આદેશ અનુસાર હવેથી રાજ્યની કોઈપણ શાળા વિદ્યાર્થીઓને ચોક્કસ પ્રકારનાં ગરમ કપડાં પહેરવા ફરજ પાડી શકશે નહીં. હવેથી વિદ્યાર્થીઓ મનપસંદ ગરમ કપડાં પહેરી શકશે. શાળા તરફથી કોઈપણ પ્રકારનું દબાણ નહીં કરી શકાય.