સ્થાનિક સ્વરાજની ચૂંટણીને લઈને નવસારી જિલ્લા ભાજપ સજ્જ માઇક્રો લેવલ પ્લાનિંગ સાથે બેઠકઓનો દોડ શરૂ

આવનારી સ્થાનિક સ્વરાજની ચૂંટણીઓને ધ્યાનમાં રાખીને નવસારી જિલ્લા ભારતીય જનતા પાર્ટી (ભાજપ) સંપૂર્ણ રીતે સજ્જ બની ગઈ છે. સંગઠનાત્મક મજબૂતી સાથે વ્યૂહાત્મક આયોજનને પ્રાથમિકતા આપવામાં આવી રહી છે. તેના ભાગરૂપે ભાજપ દ્વારા નવસારી મહાનગરપાલિકાના તમામ વોર્ડ તથા જિલ્લા પંચાયતની 30 બેઠકો પર વિસ્તારવાર બેઠકોનો દોર શરૂ કરવામાં આવ્યો છે.

આ બેઠકોમાં જિલ્લા અને તાલુકા સ્તરના હોદ્દેદારો સાથે સ્થાનિક અગ્રણીઓ, પેજ પ્રમુખો અને બૂથ લેવલના કાર્યકર્તાઓ ઉત્સાહપૂર્વક જોડાઈ રહ્યા છે. બેઠક દરમિયાન સંગઠનને વધુ મજબૂત બનાવવા માટે માર્ગદર્શન આપવામાં આવી રહ્યું છે.

નવસારી જિલ્લા ભાજપ પ્રમુખ ભુરાભાઈ શાહના માર્ગદર્શન હેઠળ ચૂંટણીના ઇન્ચાર્જ અશોકભાઈ ધોરાજી, સનમ પટેલ, પિયુષ પટેલ તથા કરસનભાઈ ટીલવા સક્રિય રીતે જોડાયા છે. ઉપરાંત જિલ્લા મહામંત્રીઓ જીગરભાઈ દેસાઈ, શાંતિલાલ પટેલ અને ડૉ. લોચન શાસ્ત્રી પણ બેઠકોમાં હાજરી આપી કાર્યકર્તાઓને માર્ગદર્શન આપી રહ્યા છે.

બેઠકો દરમિયાન દરેક વિસ્તારની જમીન સ્તરની પરિસ્થિતિને ધ્યાનમાં રાખી કાર્યકર્તાઓ સાથે સીધી ચર્ચા કરી અસરકારક ચૂંટણી રણનીતિ ઘડી કાઢવામાં આવી રહી છે. ખાસ કરીને માઇક્રો લેવલ પ્લાનિંગ પર ભાર મૂકવામાં આવ્યો છે, જેમાં બૂથવાર મતદારોની માહિતી, નવી મતદાર નોંધણી, ઘર-ઘર સંપર્ક અભિયાન અને સરકારની લોકકલ્યાણકારી યોજનાઓને લોકો સુધી પહોંચાડવા માટેની યોજના તૈયાર કરવામાં આવી રહી છે.

આ ઉપરાંત દરેક બૂથ પર મજબૂત ટીમ ઉભી કરવા, પેજ પ્રમુખ વ્યવસ્થાને સક્રિય બનાવવાની સાથે યુવા અને મહિલા કાર્યકર્તાઓની ભાગીદારી વધારવા તથા સોશિયલ મીડિયા દ્વારા અસરકારક પ્રચાર માટે વિશેષ માર્ગદર્શન આપવામાં આવ્યું છે.

પાર્ટીના આગેવાનો દ્વારા કાર્યકર્તાઓમાં ઉત્સાહ અને આત્મવિશ્વાસ વધારતા જણાવ્યું હતું કે સંગઠનની એકતા, કાર્યકર્તાઓની મહેનત અને સચોટ આયોજનના આધારે ભાજપ આગામી સ્થાનિક સ્વરાજની ચૂંટણીઓમાં નોંધપાત્ર વિજય હાંસલ કરશે.

નવસારી જિલ્લામાં તબક્કાવાર યોજાઈ રહેલી બેઠકો અને માઇક્રો લેવલની તૈયારીને કારણે કાર્યકર્તાઓમાં નવી ઊર્જા અને જુસ્સો જોવા મળી રહ્યો છે, જે આગામી ચૂંટણીમાં સકારાત્મક પરિણામ લાવશે તેવી આશા વ્યક્ત કરવામાં આવી રહી છે.