જમ્મુ-કાશ્મીરના રાજૌરીમાં આતંકવાદીઓ સાથેની અથડામણમાં 2 જવાન શહીદ, 4 ઘાયલ

જમ્મુ-કાશ્મીરના રાજૌરીમાં ઓપરેશન દરમિયાન આતંકવાદીઓ દ્વારા કરવામાં આવેલા વિસ્ફોટમાં સેનાના બે જવાન શહીદ થયા છે.ચાર અધિકારીઓ ઘાયલ થયા છે.

શુક્રવારે સવારે 7.30 વાગ્યે સેનાની સર્ચ ટીમનું આતંકીઓ સાથે અથડામણ થઈ હતી. આ દરમિયાન બંને તરફથી ગોળીબાર થયો હતો. આ પછી આતંકીઓએ ભાગવા માટે બ્લાસ્ટ કર્યો હતો.

જમ્મુ-કાશ્મીરના રાજૌરીમાં શુક્રવારે સુરક્ષાદળો અને આતંકવાદીઓ વચ્ચે અથડામણ થઈ હતી. નોર્ધન કમાન્ડના જણાવ્યા અનુસાર, જમ્મુ અને કાશ્મીરના રાજૌરીમાં એક ઓપરેશન દરમિયાન આતંકવાદીઓ દ્વારા કરવામાં આવેલા વિસ્ફોટમાં સેનાના બે જવાન શહીદ થયા હતા અને ચાર અધિકારીઓ ઘાયલ થયા હતા. હાલ આ વિસ્તારમાં ઓપરેશન ચાલી રહ્યું છે. સુરક્ષાની દૃષ્ટિએ જિલ્લામાં ઇન્ટરનેટ સેવા બંધ કરી દેવામાં આવી છે.

સેનાએ એક નિવેદનમાં જણાવ્યું કે આ ઘટના ત્યારે બની જ્યારે સેનાની ટીમ રાજૌરી સેક્ટરના કાંડી જંગલ વિસ્તારમાં સર્ચ ઓપરેશન ચલાવી રહી હતી. જમ્મુ ક્ષેત્રના ભાટા ધુરિયાનના ટોટા ગલી વિસ્તારમાં મંગળવારે આર્મી ટ્રક પર હુમલો કરનારા આતંકવાદીઓના જૂથને શોધવા માટે ટીમ ઈન્ટેલિજન્સ ઈનપુટ્સના આધારે કામ કરી રહી છે. કાંડી જંગલના ગીચ વનસ્પતિ અને ખડકાળ વિસ્તારમાં એક ગુફામાં આતંકવાદીઓની હાજરીની માહિતીના આધારે ગુરુવારે સંયુક્ત ઓપરેશન શરૂ કરવામાં આવ્યું હતું.

નિવેદનમાં કહેવામાં આવ્યું છે કે નજીકના વિસ્તારોમાંથી વધારાની ટીમોને એન્કાઉન્ટર સ્થળ પર મોકલવામાં આવી છે અને ઘાયલ જવાનોને ઉધમપુરની કમાન્ડ હોસ્પિટલમાં લઈ જવામાં આવ્યા છે. પ્રાથમિક અહેવાલો અનુસાર, આતંકવાદીઓનું એક જૂથ આ વિસ્તારમાં ફસાયેલું છે, તેણે ઉમેર્યું હતું કે, “આતંકવાદી જૂથમાં જાનહાનિ થવાની સંભાવના છે અને ઓપરેશન ચાલુ છે.” દરમિયાન, રાજૌરી વિસ્તારમાં મોબાઈલ ઈન્ટરનેટ સેવાઓ સ્થગિત કરવામાં આવી છે, એમ અધિકારીઓએ જણાવ્યું હતું.