નવસારી જિલ્લાને મળી ૧૨મી મોબાઈલ વેટરનરી યુનિટ ચીખલી તાલુકાના હોન્ડગામ સહિત આસપાસના ૧૦ ગામોમાં પોતાની સેવા આપશે

નવસારી જિલ્લા પંચાયતના પ્રાગણમાંથી ચીખલી તાલુકાના હોન્ડ ગામ માટે આજ રોજ કેન્દ્ર સરકાર પુરસ્કૃત ફંડમાંથી મોબાઈલ વેટરનરી યુનિટ (ફરતું પશુ દવાખાનું)નું લોકાર્પણ જિલ્લા પંચાયત પ્રમુખ પરેશભાઈ દેસાઇના હસ્તે કરવામાં આવ્યું હતું. ગુજરાતમાં પશુ સારવાર માટે ભારત સરકારની યોજના હેઠળ હાલ મોબાઈલ વેટરીનરી યુનિટ કાર્યરત છે.જેને અનુલક્ષીને ગુજરાત રાજયના નવસારી જિલ્લા સહિત અમદાવાદ, ગાંધીનગર, છોટા ઉદેપુર, તાપી, નર્મદા, પંચમહાલ, બનાસકાંઠા, ભરુચ અને મહીસાગર જિલ્લામાં નવા મોબાઈલ વેટરીનરી યુનિટની ભેટ અપાઈ રહી છે.

આ નવા મોબાઇલ વેટરનરી યુનિટ હોન્ડગામ સહિત આસપાસના ૧૦ ગામોમાં પોતાની સેવા આપશે.નવસારી જિલ્લામાં ૧૧ મોબાઈલ વેટરનરી યુનિટની સુવિધા ઉપલબ્ધ છે. આજરોજ લોકાર્પણ થયેલ આ મોબાઇલ વેટરનરી યુનિટ જિલ્લાની ૧૨મી મોબાઇલ વેટરનરી યુનિટ છે.

આ પ્રસંગે જિલ્લા પંચાયત ઉપપ્રમુખ અંબાબેન મહાલા, નાયબ પશુપાલન અધિકારી ડો. એમ.સી.પટેલ, પ્રોજેક્ટ કોર્ડીનેટર નિરવ પ્રજાપતિ તથા મોબાઈલ વેટરનરી યુનિટના ડોક્ટરો અને પાયલોટો તમામ તાલુકાના પશુ ચિકિત્સકો સહિત વિવિધ સમિતિના ચેરમેનો ઉપસ્થિત રહ્યા હતા.