નવસારી જિલ્લાના વાંસદા તાલુકાના સુખાબારી ગામે ફાયરિંગ બટ વિસ્તારમાં તારીખ 20 મી ડિસેમ્બર થી ૩૧મી જાન્યુઆરી સુધી પ્રવેશબંધી જાહેર કરાઈ

નવસારી પોલીસની ફાયરિંગ પ્રેક્ટિસ દરમિયાન ૪૩ દિવસ માટે રાહદારીઓના પ્રવેશ પર પ્રતિબંધ જાહેર:ગોળીબાર કે અશ્રુવાયુના અભ્યાસ દરમિયાન ઈજા ન થાય તે માટે જાહેર જનતાએ સાવચેત રહેવું

આવતીકાલથી એટલે કે તા. ૨૦-૧૨-૨૦૨૪ થી નવસારી જિલ્લાના વાંસદા તાલુકાના સુખાબારી ગામ સ્થિત ફાયરીંગ બટ ખાતે નવસારી પોલીસ દ્વારા ફાયરિંગ પ્રેક્ટિસ યોજાશે. જેના કારણે અધિક જિલ્લા મેજિસ્ટ્રેટ શ્રી વાય. બી. ઝાલાએ જાહેરનામું પ્રસિદ્ધ કરીને આ વિસ્તારમાં રાહદારીઓના પ્રવેશ પર પ્રતિબંધ ફરમાવ્યો છે.

જાહેરનામા અંતર્ગત ફાયરિંગ પ્રેક્ટિસ દરમિયાન સુખાબારી ગામ સ્થિત ફાયરીંગ બટના વિસ્તારમાં આજુબાજુના રહીશો તેમજ બહારના કોઈ અનઅધિકૃત વ્યક્તિઓ આ જમીનની હદ વિસ્તારમાં પ્રવેશ કરવા અથવા હદમાં ફરવા કે ઢોર-ઢાંખરને પ્રવેશ આપવા માટે મનાઈ ફરમાવવામાં આવી છે. તા. ૨૦-૧૨-૨૦૨૪ થી તા. ૩૧-૦૧-૨૦૨૫ ના સમયગાળા દરમિયાન સવારે ૬ કલાકથી સાંજે ૬ કલાક સુધી અથવા કાર્યક્રમ પૂર્ણ થાય ત્યાં સુધી એટલે કે ૪૩ દિવસ માટે ઉક્ત વિસ્તારમાં પ્રવેશબંધી ફરમાવવામાં આવી છે. આ સાથે જ ગોળીબાર તથા અશ્રુવાયુના અભ્યાસ દરમિયાન ઈજા ન થાય તે માટે જાહેર જનતાને સાવચેત રહેવા જણાવાયું છે.

આ હુકમનો ભંગ કરનાર ગુજરાત પોલીસ અધિનિયમ-૧૯૫૧ની કલમ-૧૩૫ મુજબ શિક્ષાને પાત્ર થશે.