સુરત રેન્જ આઈ.જી.પ્રેમવીર સિંહ દ્વારા નવસારી ખાતે વાર્ષિક ઇન્સ્પેક્શન:પોલીસ અને જનતા વચ્ચેનો વિશ્વાસ મજબૂત, અત્યાધુનિક ડ્રીલ્સ ટેકનોલોજી અને ડ્રોન ટેકનોલોજીનું નિદર્શન કરાયું,37 લાખનો મુદ્દામાલ પરત કરાયો

સુરત રેન્જ આઈ.જી પ્રેમવીર સિંહે નું આજે નવસારી જિલ્લાના એરુ રોડ પર આવેલા પોલીસ હેડક્વાર્ટર ખાતે વાર્ષિક ઇન્સ્પેક્શન પરેડ યોજી હતી. આ નિરીક્ષણનો મુખ્ય ઉદ્દેશ્ય જિલ્લા પોલીસની સમગ્ર વર્ષ દરમિયાનની કામગીરી અને કાયદો-વ્યવસ્થા જાળવવાની સજ્જતાનું મૂલ્યાંકન કરવાનો હતો.

https://www.facebook.com/share/v/1CMDkDf4vX/

​અત્યાધુનિક ડ્રીલ્સ ટેકનોલોજી અને ડ્રોન ટેકનોલોજીનું નિદર્શન

​ઇન્સ્પેક્શન પરેડ દરમિયાન, નવસારી જિલ્લા પોલીસે તેમની કાર્યશૈલીમાં ઉપયોગમાં લેવાતી આધુનિક ટેકનોલોજીનું પ્રભાવશાળી નિદર્શન રજૂ કર્યું હતું. ખાસ કરીને, ડ્રોન ટેકનોલોજીનો ઉપયોગ કઈ રીતે દૂરથી પણ મોનિટરિંગ અને સર્વેલન્સ માટે થઈ શકે છે, તે દર્શાવવામાં આવ્યું હતું. રેન્જ આઈ.જી.એ આ ટેકનોલોજીકલ સજ્જતાની ઝીણવટપૂર્વક સમીક્ષા કરી અને આધુનિક સાધનોના ઉપયોગ બદલ પોલીસ દળની પ્રશંસા કરી હતી

આ પ્રસંગે રેન્જ આઈ.જી. પ્રેમવીર સિંહે જણાવ્યું હતું કે, “આ પરેડ નવસારી પોલીસના મુખ્ય મથક ખાતે પ્રથમ વખત કરવામાં આવી છે. આ નિર્માણ આધીન સ્થળ પર વિભિન્ન પ્રકારની પોલીસ ડ્રીલ્સનું આયોજન કરવામાં આવ્યું હતું. ખાસ કરીને, બિલ્ડીંગનું મોનિટરિંગ ડ્રોન દ્વારા કરવામાં આવ્યું, જે પોલીસની ટેકનોલોજીકલ સજ્જતા દર્શાવે છે.”

​‘તેરા તુજકો અર્પણ’ કાર્યક્રમ હેઠળ મુદ્દામાલ પરત

​ઇન્સ્પેક્શનના ભાગરૂપે, નવસારી પોલીસે ‘તેરા તુજકો અર્પણ’ કાર્યક્રમનું પણ આયોજન કર્યું હતું. આ કાર્યક્રમ હેઠળ, પોલીસે જપ્ત કરેલા અને સફળતાપૂર્વક શોધી કાઢેલા રૂ. ૩૭ લાખની કિંમતના મુદ્દામાલને તેના મૂળ ફરિયાદીઓને પરત કરવામાં આવ્યો હતો. આ માનવતાવાદી પહેલથી પોલીસ પ્રત્યે જનતાનો વિશ્વાસ વધુ મજબૂત બન્યો છે, જે પોલીસ-પબ્લિક સહયોગ માટે અત્યંત જરૂરી છે.

‘ત્રણ વાત તમારી, ત્રણ વાત અમારી’ અભિયાન અને બુદ્ધિજીવીઓ સાથે સંવાદ

​રેન્જ આઈ.જી. પ્રેમવીર સિંહે ‘ત્રણ વાત તમારી, ત્રણ વાત અમારી’ અભિયાન અંતર્ગત શહેરના બુદ્ધિજીવી વર્ગ સાથે એક સંવાદ સભા યોજી હતી. આ સંવાદમાં બુદ્ધિજીવીઓએ કાયદા અને વ્યવસ્થા સંબંધિત વિવિધ સમસ્યાઓ અને સૂચનો રજૂ કર્યા હતા. રેન્જ આઈ.જી.એ આ તમામ મુદ્દાઓને ધ્યાનમાં લઈ તેના સકારાત્મક અને ઝડપી નિરાકરણની ખાતરી આપી હતી, જે પ્રશાસન અને નાગરિકો વચ્ચેના સકારાત્મક સંબંધોની સાક્ષી પૂરે છે.

સાઇબર ક્રાઇમ અંગે જનજાગૃતિની અપીલ

વર્તમાન સમયમાં સાઇબર ક્રાઇમને એક મોટી અને ગંભીર સમસ્યા ગણાવતા, રેન્જ આઈ.જી.એ નવસારીની જનતાને આ અંગે વિશેષ રૂપે જાગૃત રહેવા અપીલ કરી હતી. તેમણે ભારપૂર્વક જણાવ્યું કે, કોઈપણ વ્યક્તિ જો સાઇબર ક્રાઇમનો ભોગ બને, તો તેણે સમય બગાડ્યા વિના તાત્કાલિક પોલીસનો સંપર્ક કરવો જોઈએ, જેથી ગુનેગારો સામે ઝડપી અને કાયદેસરની કાર્યવાહી થઈ શકે.