મરીન ટાસ્ક ફોર્સ દ્વારા દરિયાઈ સુરક્ષા તકેદારી અંતર્ગત જલાલપોર તાલુકાના દાંડીથી સામાપોર સુધી સઘન કોસ્ટલ પેટ્રોલીંગ હાથ ધરવામાં આવ્યું

નવસારી જિલ્લામાં દરિયાઈ સુરક્ષા વ્યવસ્થા વધુ મજબૂત બનાવવા તથા સંભવિત આતંકવાદી પ્રવૃત્તિઓને અટકાવવાના હેતુથી મરીન ટાસ્ક ફોર્સ દ્વારા સઘન કોસ્ટલ પેટ્રોલીંગ હાથ ધરવામાં આવ્યું હતું.દરિયાકાંઠા વિસ્તારમાં શંકાસ્પદ વ્યક્તિઓની હિલચાલ પર નજર રાખવા તેમજ દરિયાકાંઠેથી મળી આવતી શંકાસ્પદ બોટો, ડ્રોન, ડ્રગ્સ પેકેટ્સ, બેગ્સ તથા અન્ય કેફી પદાર્થોની ગેરકાયદે હેરાફેરી રોકવાના ઉદ્દેશ સાથે આ કાર્યવાહી કરવામાં આવી હતી.

આ સઘન કોસ્ટલ પેટ્રોલીંગનું આયોજન અધિક પોલીસ મહાનિર્દેશક અમિતકુમાર વિશ્વકર્મા (દરિયાઈ સુરક્ષા),મરીન ટાસ્ક ફોર્સના પોલીસ મહાનિરીક્ષક પી.એલ. માલ તથા નવસારીના પોલીસ અધિક્ષક એસ.જે. પરમારના માર્ગદર્શન હેઠળ કરવામાં આવ્યું હતું. નવસારી સેક્ટરના અધિકારીઓ તેમજ મરીન કમાન્ડોની વિશેષ ટીમો આ કામગીરીમાં જોડાઈ હતી.

આ કાર્યવાહી અંતર્ગત નવસારી જિલ્લાના જલાલપોર તાલુકાના દરિયાઈ વિસ્તાર દાંડીથી સામાપોર સુધી પેટ્રોલીંગ હાથ ધરવામાં આવ્યું હતું. દરમિયાન મરીન કમાન્ડોની અલગ-અલગ ટીમો દ્વારા શંકાસ્પદ વ્યક્તિઓ, વાહનો, બોટો તેમજ અવાવરૂ સ્થળોની સૂક્ષ્મ તપાસ કરવામાં આવી હતી.

દરિયાકાંઠાની સુરક્ષા સુનિશ્ચિત કરવા તથા કોઈપણ ગેરકાયદે પ્રવૃત્તિ પર કડક નજર રાખવા માટે આવી કામગીરી આગામી સમયમાં પણ સતત ચાલુ રાખવામાં આવશે.